[自用！不是教學] San Fran簡略刷機過程

聲明：本人偶爾需要刷我的Orange San Francisco內核，此文只是擷取網上百家教學，加上我自己看得懂的輔助語句，只為方便我每次刷機不用找來找去，如看倌閱後看重我的文筆，用此方法試在手機上卻慘遭變磚，與本人無關，特此聲明。


Orange San Francisco(ZTE V880)刷機



1. 安裝ClockworkMod recovery
睇http://bbs.hiapk.com/thread-893423-1-1.html


2. 刷！
Step1a - down rom，確定係zip file，放入sd咭根目錄
Step1b - down rom，關機，取出sd咭，透過card reader將rom放入sd卡根目錄


Step2a - 關機，同時按住電源+音量向下鍵，就會進入ClockworkMod recovery。
Step2b - 入返張咭，蓋返好電源及後蓋，同時按住電源及音量「-」鍵，就會進入ClockworkMod recovery。
（ClockworkMod recovery操作：音量上下對應向上向下，home鍵對應選中，返回仍是返回）


Step3- 本身有刷過機的話，先選wipe data/factory reset及wipe cache partition以wipe清機內個人化軟件及快取等東西，否定有變磚可能！

Step4 - 選install zip from sdcard，選choose zip from sdcard(類似係句咁嘢)，用音量上下選要裝的東西，選好，按home決定，再選Yes - xxxxxxxxxxxxxx，之後等待安裝，安裝完會顯示Install Complete!

Step5 - 如有其他附加包(電池包, 版面修改包之類)，跟住裝埋，裝法同Step3一樣。
Step6 - 裝晒後，返回至第一頁，選第一項reboot system now，手機自動重開，搞掂。

轉載教學 ~ 老R4+Wood R4最新內核v1.25+雙內核教學+載點

本文原作者：仙女版大
轉自她的部落格：http://blingfairy.pixnet.net/blog
這裡特此感謝她～

閱前導覽：
1. 這篇教學文裡所指的老R4，是指最原始那張R4咭，R4 SDHC、R4 ULTRA、R4 I...等等都不是(仙女版大已在文中說明)
2. 這篇教學文裡的Wood內核和Wood內核懶人包會隨時間更新，而本人或許沒時間跟著仙女版大的進度更新此文，欲看最新狀況請直接點擊http://blingfairy.pixnet.net/blog/post/31484852#comment-34755749進入原文，謝謝。

以下是原文～

昨天有個 大膽的 網友直接加我MSN，註明了有R4的問題想請教...他說他的老R4不能玩一個新的遊戲!其實我自已也有遇到這個問題，在玩雷頓教授與魔神之笛我也是瘋狂白屏，去找了補丁後才能夠運行。

而他要玩的這個GAME (歡迎回來!小小機器人開心大掃除!)，竟然打了補丁也不能玩，爬了2H的文後發現，『需要配上別的內核!!』

於是在TVGAME360論壇發現 老R4專用的自製新內核 而且可以和老R4並存成為雙內核
天吶我真是興奮，一定要寫這篇教學告訴大家這個好消息!! 老R4的玩家不用再一直為新遊戲找補丁啦，用Clean Rom玩就可以了，而且有用過老R4的人會知道這是一張無可取代的好卡，想玩舊遊戲非得靠它不可，所以並存成雙內核是多棒的事!!

:此內核為 老R4專用，  R4 SDHC、R4 ULTRA、R4 I...等等都不能用哦!!!

 wood R4 懶人包 : Wood R4 V1.25   3/3  

 雙內核並存教學: 參考出處tvgame360

 1. 原文出處  (官網?) 右上方的最新版本V1.25下載回來，解壓縮完會有以下這2個東西。

 

 PS: 如果只想使用WoodR4這個內核，將這2樣丟進小N的記憶卡就行了，此內核會直接取代原本的V1.18內核。

 2. 再來要用  R4Crypt 這個軟體，將 這個檔解密。

 3. 下載完後打開R4Crypt資料夾，將要解密的檔放入同一層。

 

 4. 執行 gui.bat 檔，會跑出下面的視窗，按1後再按Enter，就會開始跑。
 

 5. 跑完會出現這個檔案，將此檔和步驟1得到的_rpg資料夾一起放入nds的記憶卡中。如轉不出來的話，本文最上面有我已轉好的可以下載。

  

 6. 打開小N後，一樣還是原本老R4的介面，請選擇Wood R4執行小N。

 7. 老R4的遊戲存檔是可以沿用的，請將XXX.SAV 更名為 XXX.NDS.SAV

 Wood R4 相關事項:

1) 更改繁體中文介面:打開ndsl後，按start，選擇settings, 再把language選擇lnag_zh，就可以變成繁體中文。
2) 軟復位(暖開機): L+R+A+B+下
3) 顯示隱藏檔案的設定: L+select 鍵(要先按L鍵)
4) 顯示出全體設定:  L+y 鍵 (1.09版本以後)  
5) 選擇遊戲時按 L+X 鍵會顯示金手指數據庫視窗

 Wood R4金手指相關事項:

把usrcheat.dat 丟入_rpg資料夾裡的cheats資料夾裡，但請先把usrcheat.dat 轉成UTF-8碼,才不會變成亂碼。

[淘寶搜奇系列] 太陽能電筒

聞西：呢支唔係普通嘅電筒，呢支係唔洗電芯嘅太陽能電筒，喺有光源嘅時候佢着…… 

司令：咁如果冇光……

聞西：絕對唔會着。

阿漆：有冇可能冇光嘅情況底下都會着呢？

聞西：問得好！熄燈！

操作員：係！

聞西：只要攞另外一支電筒出嚟照住佢，佢就會着架嘞。

以上呢段對白，相信百分之99.9識中文嘅人都唔會陌生。

先講講淘寶搜奇系列，有感本人經常瀏覽淘寶網，實在係有嘢買、冇嘢買、有嘢想買、冇嘢想買、有嘢準備買、冇嘢準備買都會睇一餐，只差在未將淘寶網設為首頁(我有考慮過)，因此不時都發現到好多新奇、奇異、滑稽等等嘅商品，有啲睇完真係得啖笑，有啲笑完你又會想買返嚟玩吓，其中都不乏真係用得著嘅，我決定每次見到呢啲商品，都po出嚟，當係sharing又好，記錄吓又好，笑吓又好乜都好啦。

淘寶搜奇系列第一彈，冇錯！聞西嘅曠世發明－太陽能電筒。

不過事實上，呢件商品冇聞西發明嗰支咁曠世，因為佢相對實用少少－有儲電功能。

儲電能力如何就要試過先知，該店店主仲好有心咁親自拍埋條片話你知，佢見到光之後，真係會着......

店主描述如下：

該店主要售賣軍用品，軍用工具、軍用食用(軍糧)亦有發售，呢個太陽能電筒，估計身在野外可能應該會發揮到用途嘅。

有興趣睇店主親自測試視頻或有意購買嘅朋友，可按＞呢度＜。

(本文圖片取自淘寶店舖http://2012psk.taobao.com/，為免有替其打廣告之嫌及保障該店店主私隱，圖片上用於識別的水印或任何聯絡方式，均已粗略抺去，如有造成侵權或不便，敬請告知，本人定必立即刪除，特此聲明。)

視野放大！15吋轉22吋～

  WOOHOO！

前言：我知道好多人已經用緊30吋以上，總之唔好笑我大驚小怪，OK?

YOOHOO！換mon已經講咗好耐，終於換咗啦～

一下子由15吋boom成22吋，老老實實，真係唔慣，本身想換個19吋算數，一嚟空間唔多夠，二嚟真係覺得好似太大咁，但潘生一句話：

「喂揀個有hdmi插口架啦。」

咁就唯有買個22吋......

對！我知你心入面/把口講咩！

「哇～個盒"靚"到呢～！」

青BB，又有啲金色咁......真係呢......

算啦......算啦......都係個盒啫！個mon唔囧咪得囉！

難得在我哋想要嘅功能佢都有，hdmi插口x2、電視天線插口(對，這是idtv)、內置speaker......等等。

以下cap自Youtube某電影trailer，話說呢套電影我嚟緊星期日應該好似或者可能如果就到時間嘅話會去睇，第一次看到廣告已經很想睇的說～

對唔住，離晒題......



以上cap自Youtube某電影trailer，720p(1080p我部雞肋會窒)，唔知係片問題定mon問題，明顯見到顆粒感......

但我可以既確切又肯定咁講，琴晚用xbox360插高清線試mon，真係幾靚，完全冇任何顆粒感，尤其COD black ops個CG靚到呢～～咳！....又離題了。

對！我相信係片嘅問題。

見到網上有人話，呢個牌子唔掂/極差/ｘｘ之恥等等呢啲negative評價，即係呢，我唔係要好靚，但係既然佢比到想要嘅function我，價位又ok，我又冇咩所謂嘅，idtv見親都要2字頭，呢部1700蚊，我都安慰架啦。

又到續牌時 之 永久身份證

8599就係你嘅終身號碼！

大家唔好搞錯，唔係9527，係8599。

無錯，今年又到咗大堆野接近續牌死線嘅時候嘞，續狗牌啦、交行車稅啦，仲有其他「cake力卡嘞」，年頭係要洗多唔少冤枉錢。

今日適逢天朗氣清，晴空萬里，我去咗幫小傢伙續牌，小傢伙7月要補打瘋狗針(狂犬病疫苗)，諗住提早幾個月左右同佢打，所以唔打混合針住，等埋一齊先，咁今日就唔洗大費周章「的」佢來回狗房屋企，只係需要帶備：針簿一本、澳門幣兩嚿二、人一個，即可辦理，無需等候多天亦無附加收費。

從此以後（政策改變另計），我哋有幫狗納牌嘅狗主們，就冇得再儲牌仔嘞！

好彩我都冇執輸，對上3年都儲咗3份，對我嚟講好有意義架。 

[淘物分享] 潘先生騎士靴

潘先生近期最愛嘅騎士靴

比正常碼大兩碼，即本身穿42就要買40，算幾誇張。

本來打算買卡其色，點知得返黑色，～

有人心不甘情不願地買下黑色，到貨後仍然不斷質疑鞋子是否好看= =

直至當時話劇組仝人稱讚此靴好得且知道購於淘寶後眾人驚訝非常，佢先用既滿意又得戚嘅眼神係咁讚到對靴天上有地下無，仲話襯乜都好睇云云......


(本文沒有特別標明出處的圖片取自淘寶店舖http://andynw.taobao.com/，為免有替其打廣告之嫌及保障該店店主私隱，圖片上如印有用於識別的水印或任何聯絡方式，均會粗略抺去，如有造成侵權或不便，敬請告知，本人定必立即刪除，特此聲明。)

[淘物分享] Orange San Francisco 手提電話

由付款嗰刻至到而家呢秒，都未信到自己會痴到喺淘寶買部手提返嚟用。

呢件商品，應該係我玩淘寶以嚟，最貴、等得最耐、最驚喜同埋等得最心急嘅一件商品。

由資料搜集、搵好店家、購買以至收貨，都用咗唔少時間，所以以下廢話可能多啲，都係買呢部電話嘅分享，希望唔會悶到閱文嘅大家及將來重溫此文嘅自己。

由於本人偏愛摺機，所以用緊幾年前Nokia嘅N76(下圖)，當時除咗日系手機之外，想搵部好睇又OK嘅摺機，都只可以選擇N76，仲記得當時開售叫價MOP$4XXX，我諗咗一星期左右，就去CTM買咗......值唔值，見仁見智，當時我只在乎佢嘅外觀，內涵與否，我冇乜點諗。

Nokia N76(圖片取自Google)

早排，有感呢部N76都用咗4年，我用手機一向長情，唔鐘意有新就換，冇咁多流動資金梗係主要因素，另一個問題係，買部電話返嚟用用吓見新又換，要重新適應過所有設定、介面，如果唔同牌子，甚至要重新適應系統，完全唔合乎本人經濟及時效原則，我用電話，買到手之後，不論介面、程式等等，一定係set到最就自己手，就算人哋借我電話完全睇唔明都唔緊要，因為部電話係我架嘛～

廢話打咗兩段，開始講返正題XD

因為以上種種，加上腦殘的潘先生早前再次唔見手提繼而買咗部HTC Wildfire(下圖)，令我感受到而家智能手機嘅變化，所以我就密謀換機，起初只係講吓，HTC Wildfire呢部屏幕解析度咁「在十減一之上」嘅Android手機，潘先生買嗰時都要MOP$3XXX，需知我不在賭場酒店辦事，亦非中產，隨時買部手機於我而言並非食生菜般之易事，於是，我發揮80後本能－上網搵。

HTC Wildfire(圖片取自Google)

靠我嘅智慧、努力、細心(呢啲能力發揮喺工作上你話幾好)，我搵到部C/P值極高嘅Android手機－Orange San Francisco。

Orange San Francisco首個開售地點係英國，只售￡100以下(實際價錢忘了)！而且規格，雖不算係十分正，但應有的有，而且比Wildfire好(sorry我唔係有心比較的XD)，規格如下：

Orange San Francisco

－Android 2.1系統

－3.5吋WVGA OLED 電容屏幕*

－512 RAM

－512 ROM

－320萬像素攝像頭

－支持3G WCDMA/HSDPA/ Wi-Fi

－microSD卡槽

－3.5 mm 耳機插孔

－Qualcomm MSM 7227 600MHz CPU.1250mAh 電池

－機身最薄處11.8mm

－130g 重量

*後期發售的黑色及全部白色均用TFT屏幕

英國嗰邊聽講都唔少人買，而香港及中國國內，都有唔少人托朋友帶一兩部返嚟，畢竟價格實在太吸引！

Orange San Francisco並非Orange生產，情況等同Google手機，都係中國生產商，生產後外銷。Orange San Francisco由中國生產商中興(ZTE)生產，型號V880，別名Blade，順帶一提，Google嗰邊幾部，好似都係華為(Huawei)。

經我金睛火眼再三比較、研究後，我決定放棄現時所謂較知名嘅Android手機品牌，入手呢個要從英國飄洋過海嚟嘅孩子。

喺淘寶反覆搵出睇落相對穩陣、描述相對真實細緻、價格相對抵嘅店家，同店家溝通下，知道店主本人身在英國，有現貨喺手，仍然係OLED mon(我買嗰時算係過渡期，部份後補貨源開始換成TFT mon)，而且唔洗好似當時最高銷量嘅賣家咁－買OLED mon需另外加錢。

適逢聖誕節，Orange仲為每部手機送上一份聖誕禮物套裝(下圖)，聖誕禮物套裝內含扭計骰*1、搖搖*1、手錶*1(黑色或白色)、手機套*1以及黑色禮物袋*1。

聖誕禮物套裝

不過店主坦白告知，禮物套裝內呢堆嘢唔係咩名貴筍嘢，就算手錶都只係玩具貨式，旨在開心吓咁解，咁佢話因為連埋禮物套裝成份寄會超重，郵費會多啲，所以逢買手機，加1蚊就可以喺禮物套裝入面選兩款禮物，佢就塞埋入手機包裝盒入面一齊寄，我就加埋呢1蚊，總數RMB$1,600，買入呢部手機。

呢個故事未完，好長氣呢～

店主發貨後，就係慢長嘅等待，付款日係2010年12月8日，仲有一個月唔夠就到聖誕節。

記憶中店主係隔咗一日先發貨，當時各地都係大風雪，英國都唔例外，我冇怪店主，有時仲會同佢傾吓計，佢都相當健談，而且份人有禮貌，又冇架子，做朋友真係一流(sorry，又上身了)。

當時我每日嘅例行公事，就係check包裹狀態，睇英國天氣新聞。

如是者心急地等咗10日左右，見到安卓網V880區入面某仁兄po嘅一條新聞片，內容係英國因極大風雪，機場積雪極厚，多班航班雖停飛，連回老家過聖誕新年嘅人都要滯留。

我呆了，雖未至於好驚，但係心諗：「咁搞法咪隨時又要等多個星期......」
而且仲諗埋啲痴線嘢，例如係諗：「唔知英國咁凍，部機會唔會凍壞......」

然後，我再發現自己疏忽咗一樣重要嘅嘢，就係收貨地址，我應該請店主幫我寫Macau, China(via Hong Kong)！

就係因為少咗呢11個字母，我部機就變咗經北京，再走落嚟澳門......

知嗎？經北京同經香港，速度係差非常多的......

經北京，要經重重嘅關口，先要經北京海關，因為中國大陸2010年修改咗國內外出入口物品條例，徵收關稅比以前多！而且，嗰種做又36，唔做又36嘅精神，仍然始終如一、一如以往咁被世代中國政府人員發展開去，所以呢......唔洗寫得咁白，你明嘅。

平安夜前兩日，我仲心急到send email去澳門郵政局查件，第一封回mail係話未到，24號下午5點幾，我收到第二個回mail，到咗啦！到咗啦！媽！！到咗啦！

但係澳門郵政局25、26、27號連放三日聖誕假......

對，佢始終趕唔切做我嘅聖誕禮物......

唔緊要！漫長嘅英國飛機旅程、中國穿州過省，我都默默咁等佢，佢而家就瞓喺澳門，我怕咩等多三日呀！！！(唔等都要等架啦......)

12月28號，媽咪朝早外出時，幫我去埋郵政局。

佢一返到嚟，佢、潘先生、我，甚至Wubee，3人1狗，都見證住呢個歷史性嘅一刻，見證住我拆開呢嚿差在未環遊世界嘅包裹。

店主包得好好，包咗成5層泡泡紙，非常嚴密，打開埋泡泡紙之後，竟然見到......

個包裝盒包咗雪人花紙！
仲有張聖誕咭添！


張聖誕咭入面有幸福語呢啲嘢啦梗係，雖則話佢賺我唔少，但賺完你錢，付出返少少心意，呢啲我覺得幾好，起碼佢係用手寫先，勿論係咪搵人代筆，都算一番心意，而且包裝盒仲包埋雪人花紙添！我真係覺得我揀呢間店，就好似潘先生揀咗我咁，絕對冇揀錯！

但當時我立即諗：「如果打開，入面碎晒就好笑。」

二說不說把花紙溫柔地解體，包裝盒冇穿冇爛，只係開口貼紙爛咗，因為店家寄出前幫我免費解咗鎖(順便講返，Orange San Francisco因為係外銷版，所以機體set咗當地用密碼鎖，就好似日本嘅手機咁，要上網搵搵途徑:P解去密碼鎖，先可以完全使用入面嘅功能)，咁自然開口會開過。

打開後，例牌取出說明書等東西後，我摸到它了～終於～你來到我手裡了～

由英國經北京到澳門一共跑咗19日(含假日)，我的第一部Android手機－Orange San Francisco，安全到達！


(個故仔完咗架啦，下面呢part只for有興趣或有需要嘅朋友～)


唔爭在略略講吓正式使用V880前做咗啲咩

第一日刷咗芬蘭RLS3 rom，零意外，刷rom對於有電腦基礎嘅朋友應該問題不大，係搞fastboot同入ClockworkMod recovery會怕少少，始終第一次，少少緊張應該嘅。

芬蘭rom係當時最好嘅2.1rom，聽講到而家都係。

RLS3夠快夠順，仲有內置youtube，可以播youtube片，真係好正！
可惜有個大問題，就係電話打出/接收時，光感有問題，正常應該係電話貼面時，mon會關上；電話離開面時，mon會重開，既省電又方便某些電話收聽時需要輸入數字鍵。
但芬蘭RLS3 rom係電話打出/接收時，mon會關上，離開面時，光感會好似神神哋咁，mon開返一秒又熄咗，搞到每次想收線，個mon都同我玩躲貓貓咁！

為此，我再次發揮80後本能－上網搵，搵吓有冇咩解決方法或更好嘅rom，與此同時，潘先生嘅Wildfire，已可以升上官方2.2，佢仲好得戚添，因為可以用app2sd～

喺佢得戚唔夠3日嘅某一晚，我搵到當時最新嘅Japs_Jellyfish_RLS5 2.2，見普遍評價都唔錯，加上實在忍受唔到RLS3嘅來電光感問題，我決定刷！

刷完之後，成個世界就正常晒，app2sd可用，而且刷2.2後，玩angry bird都順了(Christmas version仍然有少少窒)，一路用到而家～
除卻冇咗內置Youtube呢個遺憾外，都非常好～

3/Mar/2011更新：
心思思想刷Japs_Jellyfish_RLS9 2.2！用RLS5一路冇咩問題，需要再刷嗎？

17/Sep/2011更新：
大半個月前在hkepc內的SF專門討論帖內，發現極方便的「一步搞掂GEN1升GEN2＋裝Android2.3.4rom」簡易方法。我的SF是較早期的貨，OLED mon那一批，所以是Gen1，要升2.3.4/2.3.5，需要先升上Gen2，這個簡易方法幫了很大忙，方便到極點。


(本文沒有特別標明出處的圖片均取自淘寶店舖http://52bondstreet.taobao.com/，為免有替其打廣告之嫌及保障該店店主私隱，圖片上如印有用於識別的水印或任何聯絡方式，均會粗略抺去，如有造成侵權或不便，敬請告知，本人定必立即刪除，特此聲明。)