《放課後少年》- 快樂回憶

　　前日下載咗一隻新nds game，個名叫《放課後少年》。
　　故事講述主角係一個同爸爸媽媽妹妹一齊喺某鄉村(就算唔係鄉村都絕對唔係城鎮)的開朗男仔，不久之後就要搬屋，佢平時同其他小朋友一樣每日放學返屋企放低書包就會走出街玩，期間每日都遇到唔同的人及趣事，總知喺搬屋之前喺個村度同每個人及朋友都留低美好回憶。以昭和50年初作為背景，背景音樂及畫面簡直應該令一眾nds迷叫好！真係非常出色！

　　講返隻game，第一眼睇到遊戲封面及畫面，我已經知道呢隻game非玩不可，一玩之下，真係非常令人回味，雖然本人唔係昭和50年左右出生之人，但此game之音樂畫面，主角與朋友之間的相處玩耍遊樂，完完全全令人重回當年與主角同年紀的時候，令人諗起自己都同試過同朋友有秘密基地，試過去士多仔買野食，買粒糖已經好開心架啦！諗起同街坊小朋友一齊追逐，諗起一齊發明好多唔洗錢的遊戲，真係....好開心...好快樂。快樂呢個詞，我其實已經唔識用，而家生活上冇任何事令我快樂，我字典內的快樂一詞，係會令人懷緬，會感動，唔需要感動到痛哭流涕，而係令人懷緬到心有幾個結扭住，解開就可以一再嘗試嗰種美好，咁先叫快樂。
　　
　　而家會有開心事，但係唔會有快樂事...因為發生ing的事，你唔會覺得快樂，回望過去，尤其童年時，快樂裝置會悄悄喺心內自動啟動...

《放課後少年》封面










入埋《放課後少年》官方網站，童年回憶...快樂...一湧而上...