冇常識？點生活？

＊轉自小克粉絲俱樂部

（扮咗半個台灣人都有一段時間，打篇文章都一大堆的的了了喔喔耶耶，都係做返廣東人實際啲，但不代表一定只打白話:P）

近日對手好懶好懶，冇update blog，又冇雕膠擦章，但個腦袋同對耳都異常勤力，一直聽到兼思考咗唔少問題。

上面係小克哥喺2011年1月23日，出咗一篇名為＜File#351 在谷歌道與百度路交界＞嘅圖，當中嘅文章正正hit中內心深處，連日來都未能忘懷。

有幸自己呢段時間能摱車邊做到補習姐姐，雖然冇教師咁鬼沉重嘅責任，但係至少俾我聽到兼睇到新一代超越正常思考邏輯嘅思維。

我唔明白，對新一代嚟講，咩先係常識？

而有趣嘅係，「常識」本身就係解日常知識，冇常識？點生活？

眾級學生當中，以中學生為有問題嘅表表者。

某日，初中二嘅某位同學，同我媽講開笑，講講吓，佢叫我媽夜晚唔好morning call佢，佢唔係玩架，佢係認真講架，我同我媽聽到，只有4個字：「哭笑不得」。

好，或者呢個係英語水平問題，唔算常識，又當可以拗過去，前日，某位同樣係初中二嘅同學，同我媽傾計，講起新年有咩節目，佢哋打算成班同學去燒烤，我媽講笑問佢哋：「喂你哋識唔識透爐架？」，嗰位初二男同學話：「透爐好似係用炭粉架。」又係4個字：「哭笑不得」。

以上兩個只係最常見嘅例子，溫習時嘅問題更多，仲有更多驚人嘅思維，實在不能盡錄。

呢啲天真可愛嘅中學生，已經讀緊初中二，唔通連烤都未燒過？還是大班朋友去燒烤，唔洗佢透爐，所以佢就柄埋一二邊，完全冇諗到自己係要知道吓點樣透爐？

對於呢啲新一代醒目仔醒目女嚴重超越正常邏輯嘅思考方式，我有一個極為天方夜譚嘅解決方案，就係將日常生活、交友對話、乃至透爐呢啲日常技能，甚至將當年唔知明珠定國際台嘅教育電視常識科，一併製成「芒亨」或者「CS」嘅更新大集合，唔明「芒亨」係咩？唔緊要，証明唔係新一代，斷估你思維都唔會有呢方面嘅問題(咁又唔代表冇其他問題嘅，又或者真係冇問題都未定)。

或者有人會話我，咁執著做咩啫？咪由得佢哋囉，大個自然會識架啦。

要等到幾大個？難道要等到讀完個大學學位？「大個」嘅定義係咩？

係，人會從失敗同錯誤中學習，但如果連基本問題都要等「大個」先識，難保將來街上會有幾多「大兒童」或者「大嬰兒」。