[大發現]Loreal 水清新 PACKAGE！

今日已經係年廿九啦，重有兩日就到年初一，但係冬天都大大話話過咗大半，呢個禮拜尾重話回暖添，不過都無阻我保濕救亡嘅行動。

大傷風嘅狀況底下，今晚同潘先生外出鮨味亭撐枱腳，食咗一大堆嘢，本以為$4xx埋單，點知只係$326（可恨我冇叫刺身！），及後轉戰「老屈」，俾我見到LOREAL水清新package，即時兩眼放光


據知呢兩款產品已經出咗一年左右，fine，我承認我後知後覺，但而家知都唔算太遲啫。package內包括上圖呢支ｗater-plumping mask，重有下圖呢瓶aqua-essence，單買aqua-essence貌似要$136左右，ｗater-plumping mask好似都係差唔多，而家一pack過買就$189，我冇貨比三家，不過計落算係平咗咁啦。



買咗新嘢就梗係嗱嗱臨返屋企試用啦喂！

沖涼洗面後，先用Daiso Q10爽膚水噴匀全面，仔細抺一次，作為二次清潔（此步驟實在係廢話）

抺後就直接上ｗater-plumping mask，我T字位應該係中性偏油，平時冇咩油出，但絕對受唔起滋潤型護膚品，會泛油光乃至起暗粒，春夏秋冬如是，所以我會先全面上薄薄均勻一層，再喺兩頰加多一層敷厚少少，咁就同時解決到兩頰嘅乾燥問題。

10分鐘後用爽膚水或清水抺走，我個人偏愛用熟水抺(即係飲得落口嗰啲)，感覺乾淨啲，抺乾淨後已經feel到皮膚有「動L」，跟住上aqua-essence，根據自己膚質去搽，我係先搽兩頰，再推埋頸，最後再將剩餘推至T字位。

雖則佢係一瓶essence，但我認為可作lotion之用，因為見佢盒上所寫，聲稱已有儲水功能，咁我姑且相信佢，最重要係再搽多一層lotion我未必受得住，可能會起粒，當然你唔放心咪搽多層。

我本身唔習慣塗抺太多護膚產品，今日cleaner->toner->mask->essence對我嚟講已經係好鬼多，不過秋冬搽多少少都係應該嘅