[開罐文] 海軍食品－罐頭雞中翼！

係，冇錯，我忍唔住買咗

(幹！！因為自己手殘！又要重打一次！可怒也！算！收起怒火，再打過！)

今個月頭嘅淘寶搜奇系列中提過罐頭雞中翼，詳見☞此。
而我亦一如文中及心中所想，買咗返嚟。

開罐先～

睇落已經幾正，而且亦的確有炸過再燜返嘅痕跡，果然係香炸雞中翼。

略略數過，13隻左右。

由於夜深關係，我哋都唔想食雞翼宵夜大餐，所以夾起6隻，潘生同我每人3隻分之。

蒸返熱先～(由此可見，我家沒有微波爐的，真係健康嘅原始好生活:p)

~ 7分鐘後 ~

食得！

  

偏北方口味，不過好食！

肉質絕對唔係楊協成罐頭咖哩雞嗰種「柴」，罐頭肉類嚟講，算滑了。

上圖可見，雞翼們下方，已熱出汁液，千萬記住，此汁液最好不要倒！！

精華、香味都喺晒呢啲汁入面，本身雞翼肉味偏淡，但係夠味的，想再香啲好味啲，我強烈推薦點呢啲汁，非常好食！

今次呢兩罐因為係臨期產品(即係就過期，軍用食品一般保存期三年)，所以優惠每罐只需淘寶價$9.9，我就覺得好ok嘞！又唔係放一年後先食，臨期都未過期架嘛，又有優惠價，而且好食，嗰啲汁，我都唔知幾想淥個米粉撈落去呀！

再次證明，細心搵、大膽買，淘寶係有好多好貨！