陽春白雪與下里巴人

淨睇標題，可能有好多人都唔知係咩

"陽春白雪與下里巴人"嘅分別，只要讀過澳門x業中學，音樂堂又俾呂x霞老師教過，如果話冇聽過唔該即刻用頭撞牆

我唔知澳門其他學校嘅音樂老師有冇講過，anyway，我今日喺呢度解釋一下：<"下里巴人"同"陽春白雪"都係古代楚國嘅歌曲名，屈原嘅大弟子宋玉曾著有《對楚王問》：“客有歌于郢中者，其始曰下里巴人，國中屬而和者數千人……其為陽春白雪，國中屬而和者不過數十人。”下里巴人同陽春白雪呢兩個詞後來被泛指通俗和高雅的文藝作品。>一句講晒，陽春白雪就係形容一啲上等而又高雅嘅文藝作品，而相反下里巴人則形容普通甚至下等及通俗嘅文藝作品，而呢兩個詞多數都係用嚟形容音樂

講埋咁多廢話做咩呢？未悶過咩？唔係，只係我近排聽到兩首歌，雖然風格語言各異，但係都足以用陽春白雪與下里巴人嚟形容佢地，齋講可能空泛啲，我哋大家一齊嚟用心感受一吓

先嚟下里巴人！

鄧穎芝 - <Stop Stop Stop>

呢首歌原曲係由Nu Virgos主唱(有興趣可到此處觀看MV)，後又改篇為國語版，就係蔡依林主唱的<Love Love Love>(有興趣可到此處觀看MV)，事隔咁耐，而家又改篇為粵語版，由鄧穎芝唱，本人對鄧穎芝不嬲都冇好感，一嚟冇唱功，唔止冇唱功，直頭係唱歌冇感情，又係嗰堆讀晒啲音出嚟嘅歌星其中一個！而聽過由佢演繹嘅廣東話版<Stop Stop Stop>，未聽到一半已經嗌屌，唔小心睇過個MV或唔小心聽到首歌嗰啲應該要嗌洗眼及洗耳！

好！插完下里巴人，就嚟返個陽春白雪嚟平衡一下

Alicia Keys - <If I ain't got you>

恕本人孤陋寡聞，第一次聽呢首歌其實係聽方大同演唱會內佢同謝安琪翻唱(有興趣可到此處觀看視頻)，然後先再去搜尋原唱，兩個版本各有味道，都悅耳非常

後記：

雖則話唔同風格唔同語言好難比較，但係就悅耳程度，<If I ain't got you>已經比粵語版<Stop Stop Stop>好千倍萬倍啦，其實兩首相比，可以話侮辱咗Alicia Keys同<If I ain't got you>呢首歌，鄧穎芝真係應該摺埋再返屋企坐喺床下底諗清楚要唔要轉行

其實音樂上仲有好多"陽春白雪與下里巴人"嘅例子，實在多到講唔晒，唯有等各位朋友自己增進後慢慢發現